обновлено: 10:12, 02 мая 2024
Няръяна Ӈэрм
Тодо яхана илена’’ ӈэрм’ тер’’ ма’’лы’’
Ӈоб’’ си’’ив яля’ Москва харад тодо яхат товы ӈэрм’ терхат панӈа. Пыдо’ тев’ ёльцяӈгана ӈоб’’ ненадо серкато’ ма’’люрцеты’’. Теда’ ӈод’’ таславы ялямдо’ нидонзь ӈэдара’’. Си’’ив я’ тер’’ «Сокровища Севера» нюбета выставка-ярмаркан’ турӈаць. Тюку по’ хуркари’’ ила’ саирм’ лэтрамбава’, невхы илам’ минрева’, тамна ӈани тарана серо минрець. Сидто’ тодо яхана илена’’ ӈэрм’ терӈэ ӈарка Ассоциацияна’’ хавна ООО «Абориген Экспо Тур», ООО «Сахалинская Энергия» нядабавыць.
Время для чтения ~ 3 минуты
Сяхаринда ярмарканда мюня тамна хуркари фестиваль’’, пирдырма’’ ӈэсеты’’. Тюку по’ тамна ӈопой тарана сер’’ ӈадимясь. Не’’ харто’ мято’ танясь, «Женская гостиная» нюбе’’ӈась. Тикы’ нямна вадамбой’ ӈадибер’’манда газетаханана’’ падыбаӈгуна’’. Ӈокханда мат’’ юркад вата Россияна’’ тиӈгы яхат товыць.
Мале нердена яляха’’на выставкыдо’ манзаралъядаць. Хусувэй яля минревы серкат етри’ панӈась. Хусувэй товы’’ е’’эмняндо’ таславы лоходо’ таняць, мюняндо’ яндо’ илам’ манэ’’лабтамбиць. Тарци’’ помна ӈани’ конкурс миӈась. Ёто’ нямна ӈэда лахарюдо’ нердена яляхад пяйдонзь. Хусувэй хибяри ӈани няхатата ва’’лёй ӈэван’ харвась. Тэри сыртаӈэ нянани сямянхат сава «экспозиция»ӈэ тёняӈы хаби’’ нина’’ сертавым’ тасладамзь. Маня’’ округва’’ тодо районхат товы’’ мел’’ ненэця’’ манэ’’лабтамбидонзь. Хэвнякуна Тасу’ яв’ няд товы’’ нина’’ няби Надымской район’ тер’’ мядо мярвы’’. Манэ’’лабтамбавандидо’ тамна нерняна ӈаць.
Не’’ е’’эмня сертавы мядонди’’ мядм’ ӈобтикы нердена яляхана нэдонзь. Тикамдо’ небо’ ӈэвы не’’ форумхана минре тасладонзь. Выставкахана мято’ саць тарана серо минресь. Нюрте’’э’ харе’’ тэнзато’ ӈавар’’ нямна лаханаць. Ханяӈы’’ ненэця’’ манэ’’лабтамбидонзь. Яна’’ тер учёной нява’’ Елена Тимофеевна Пушкарёва небо’ ӈавар’’ нямна ӈадимдевы книгамда ваде’’ӈась. Ӈани нидо’ ӈавыдота’’ ӈавар манэ’’лабтамбиць.
Няби яляхана вадина’’ лэтрава’, нерня’ минрева’ нямна тасалкурӈаць. Хуркари едэй книга ӈадимдевамдо’ ваде’’ӈаць. Паднани’’ конкурсхана нерня’ ха’’амвы нидо’ манэ’’ӈаваць. Тюку мэвахана не’’ минрена манзая ненадовна ӈадись.
Нердена яӈорэй’ выставкахана лекция танясь. Тикы серм’ учёной нява’’, ненэй ненэцие’’ сава ня Андрей Головнёв минредась. Пыда вадада Ӈэрм’ ё’’ нямна ӈась. Ма’’нисяв, хусувэй сава ӈамгэ’’ сяхаринда илева’ ямбан’ Ӈэрм’ я’ няд пэӈга’’. Сидя час’ пир’’ мэё вадамда минредась. Ня’’амнанда ӈобтикы лаха паднаӈгува’’.
Сайнорта’’ нина’’ ӈани’ тензебтейдонзь. Выставкан’ сайнормы няхаюна’’, тедари’ лекар’’ мякана юседанаха’ товэхэнзь. Небяюди’ хэвхананди’ мэ’’ӈаханзь. Тарця нина’’ е’’эмня тодо яхана иленаӈэ ӈарка Ассоциациява’’ ненадо серо минре. Сайнорта ненэцяӈг’’ тарана ӈавэ ханла ӈани’ ӈэдалёрӈа’’. Теда’ поӈганандо’ саюхат ява’’ ӈэдабада ӈока.
Автор: Марина’ Яр’ падвы
